பருத்தி பிளஸ்!

பருத்தி, முக்கிய வணிகப் பயிர்களில் ஒன்றாக விளங்குகிறது. இதில், பூக்கள், சப்பைகள் மற்றும் காய்கள் உதிர்தல், பூச்சி மற்றும் நோய்த் தாக்குதல்கள் போன்ற பிரச்சனைகள் ஏற்படுகின்றன. இவற்றைச் சரி செய்ய, கீழ்க்கண்ட மேலாண்மை முறைகளைப் பின்பற்ற வேண்டும்.

உர மேலாண்மை

பருத்தி சாகுபடியில், உற்பத்தித் திறனை அதிகரிக்க, தொழுவுரம் மற்றும் குப்பையை உரமாக இடலாம். அல்லது ஆட்டுக்கிடை அமர்த்தி நிலத்தில் உரம் சேர்க்கலாம். எக்டருக்கு 12.5 டன் தொழுவுரம் வீதம் இட்டு, மண்ணின் அங்ககத் தன்மையை நிலை நிறுத்தலாம். மண் பரிசோதனை செய்து அதற்கேற்ப, இரசாயன உரங்களை இட வேண்டும். அல்லது பொதுப் பரிந்துரைப்படி உரங்களை இட வேண்டும். இரகங்களுக்கு, 174:250:67 கிலோ யூரியா, சூப்பர் பாஸ்பேட், பொட்டாசை இட வேண்டும். வீரிய ஒட்டு இரகங்களுக்கு, 260:375:100 கிலோ யூரியா, சூப்பர் பாஸ்பேட், பொட்டாசை இட வேண்டும்.

யூரியாவை, மூன்று பிரிவாகப் பிரித்து, முதல் பகுதியை அடியுரமாகவும், மீதமுள்ள இரு பகுதியை, நட்ட 45 மற்றும் 65 நாட்களில் மேலுரமாக இட வேண்டும். இந்த உர மேலாண்மையைக் கடைப்பிடிப்பதன் மூலம், பருத்தியில் அதிக மகசூலைப் பெறலாம்.

நுனிக் கிள்ளுதல்

விதைத்த 45 நாட்களில் பார்களை எடுத்து, செடிகளுக்கு மண் அணைக்க வேண்டும். மேலும், பருத்தி சாகுபடியில் நுனிக் கிள்ளுதல், முக்கிய உழவியல் முறையாகும். செடிகள் அதிக உயரமாக வளரும் போது, பூச்சி, நோய்த் தாக்குதலுக்கு உட்பட நேரிடும். எனவே, இரகங்களுக்கு 75-80 நாளில், 15-ஆம் கணுவிலும், வீரிய ஒட்டு இரகங்களுக்கு 85-90 நாளில் 20-ஆம் கணுவிலும், தண்டின் நுனியைச் சுமார் பத்து செ.மீ. அளவில் கிள்ளி விட வேண்டும். இப்படிச் செய்தால், பக்கக் கிளைகள் உருவாகி, பூக்கள் மற்றும் காய்களின் எண்ணிக்கை அதிகரிக்கும். மேலும், காய்கள் ஒரே நேரத்தில், உரிய காலத்தில் வெடிக்கும்.

தழைச்சத்துப் பற்றாக்குறை

அறிகுறிகள்: இலைகள் சிறுத்து நுனியிலிருந்து அடியிலை வரை மஞ்சளாக மாறும். பழுப்புப் புள்ளிகள் இலைகளில் ஓரங்களில் ஏற்படும்.

தீர்வு: ஒரு லிட்டர் நீருக்கு 10 கிராம் யூரியா வீதம் எடுத்துக் கலந்து, அறிகுறிகள் மறையும் வரை இலைகளில் தெளிக்க வேண்டும்.

மணிச்சத்துப் பற்றாக்குறை

அறிகுறிகள்: செடிகள் வளர்ச்சிக் குன்றி, கரும்பச்சை நிறத்தில் இருக்கும்.

+ இலைகள் சிறுத்துக் காணப்படும். இந்த அறிகுறிகள் முதலில் அடியிலைகள் அல்லது முதிர்ந்த இலைகளில் தென்படும்.

+ பிறகு, மேலுள்ள காம்புகள் வரை தென்படும். மலா்ச்சியும், காய்ப்பிடிப்பும் தாமதமாக நடக்கும். இலைகளில் சிவப்பு நிறம் தோன்றும்.

தீர்வு: இரண்டு சதவீத டிஏபி கரைசலை, அதாவது, நூறு லிட்டர் நீருக்கு 2 கிலோ டிஏபி வீதம் கலந்து தெளிக்க வேண்டும்.

சாம்பல் சத்துப் பற்றாக்குறை

அறிகுறிகள்: காய்கள் சிறுத்தும், முதிராமலும், வெடிக்காமலும் இருக்கும்.

தீர்வு: ஒரு லிட்டர் நீருக்கு 10 கிராம் பொட்டாசியம் குளோரைடு வீதம் எடுத்துக் கலந்து, பருத்திச் செடிகள் பூக்கும் போதும் மற்றும் பருத்திக் காய்கள் வெடிக்கும் போதும், இலைகளில் தெளிக்க வேண்டும். இந்தத் தெளிப்பை, பற்றாக்குறை அறிகுறிகள் மறையும் வரை தொடர வேண்டும்.

மெக்னீசியப் பற்றாக்குறை

அறிகுறிகள்: கீழேயுள்ள இலைகள் குங்கமச் சிவப்பு நிறமாக மாறும். நரம்புகள் பச்சை நிறத்தில் இருக்கும். இலைகள் முதிர்வதற்கு முன்பே உதிர்ந்து விடும்.

தீர்வு: பற்றாக்குறை அறிகுறிகள் மறையும் வரை, 15 நாட்கள் இடைவெளியில், ஒரு லிட்டர் நீருக்கு 20 கிராம் மெக்னீசியம் சல்பேட் மற்றும் 10 கிராம் யூரியா வீதம் கலந்து, இலைகளில் தெளிக்க வேண்டும்.

போரான் பற்றாக்குறை

அறிகுறிகள்: காய்கள் முதிரும் காலம் கூடும். செடிகளின் நுனிகளில், கிளைகள் அடர்த்தியாகத் தோன்றும். காய்கள் உருவாதல் குறையும்.

தீர்வு: பற்றாக்குறை அறிகுறிகள் மறையும் வரை, ஒரு லிட்டர் நீருக்கு 3 கிராம் போராக்ஸ் வீதம் கலந்து, தழைக்கும் போதும், பூக்கும் போதும், காய்க்கும் போதும் இலை வழியாகத் தெளிக்க வேண்டும்.

துத்தநாகப் பற்றாக்குறை

அறிகுறிகள்: இலைகளின் நரம்பிடைப் பகுதி, மஞ்சளாகவும், பழுப்பு நிறமாகவும் மாறி விடும். அடியிலைகள் மொரமொரப்பாக நொறுங்கும் தன்மையில் இருக்கும்.

+ இலை ஓரங்கள் மேல் நோக்கி வளைந்திருக்கும். நுனிக் கிளைகளில் சிறிய இலைகள் கொத்தாக இருக்கும். அடிப்பாகத்தில் இலைகள் இருக்காது.

+ காய்க்கும் காலம் நீடிக்கும்.

தீர்வு: இந்த அறிகுறிகள் மறையும் வரை, பத்து நாட்கள் இடைவெளியில், ஒரு லிட்டர் நீருக்கு 5 கிராம் துத்தநாக சல்பேட் வீதம் எடுத்துக் கலந்து, தொடர்ந்து தெளிக்க வேண்டும்.

பருத்தி பிளஸ்

பருத்தியில் பூக்கள் மற்றும் சப்பைகள் உதிர்வதைக் கட்டுப்படுத்த, தமிழ்நாடு வேளாண்மைப் பல்கலைக் கழகத்தின் பயிர் வினையியல் துறை, பருத்தி பிளஸ் என்னும் பூஸ்டரை வெளியிட்டு உள்ளது. இது, பருத்திக்குத் தேவையான பேரூட்டங்கள், நுண் சத்துகள் மற்றும் வளர்ச்சி ஊக்கிகள் கலந்த இடுபொருளாகும். இதை, ஏக்கருக்கு 2.5 கிலோ வீதம் எடுத்து, 200 லிட்டர் நீரில் கலந்து, பருத்திச் செடிகள் பூக்கும் போதும், காய்க்கும் போதும் தெளிக்க வேண்டும். இப்படி இரண்டு முறை தெளிக்க, ஐந்து கிலோ பூஸ்டர் தேவைப்படும்.

இதன் மூலம், பூக்கள் மற்றும் சப்பைகள் கொட்டுதல் தவிர்க்கப்படும். காய்கள் நன்றாக வெடித்து, சீராக அறுவடைக்கு வரும். செடிகளில் வறட்சியைத் தாங்கும் தன்மை கூடும். விளைச்சல் 18 சதம் வரை அதிகரிக்கும்.

திரவநிலை பருத்தி பிளஸ்

தற்போது அதிகரித்து வரும் வேலையாட்கள் தட்டுப்பாடு மற்றும் சாகுபடிச் செலவைக் குறைக்கும் வகையில், ட்ரோன் மூலம் தெளிக்க ஏதுவாக, திரவநிலை பருத்தி பிளஸ் என்னும் பூஸ்டரை, தமிழ்நாடு வேளாண்மைப் பல்கலைக் கழகத்தின் பயிர் வினையியல் துறை கண்டுபிடித்து உள்ளது.

இதை, ஏக்கருக்கு ஒரு லிட்டர் வீதம் எடுத்து, 19 லிட்டர் நீரில் ஒட்டும் திரவத்துடன் கலந்து, பருத்திச் செடிகள் பூக்கும் போதும், காய்க்கும் போதும் என, இருமுறை தெளிக்க வேண்டும்.