கீரைகள் மிகவும் சத்தானவை. தினமும் ஏதாவது ஒரு கீரையை உணவில் சேர்த்துக் கொள்வது உடம்புக்கு நல்லது என்று மருத்துவர்கள் கூறுகின்றனர். இவ்வகையில், மக்கள் விரும்பும் தண்டுக்கீரை சாகுபடியைப் பற்றி இங்கே பார்க்கலாம்.
தண்டுக்கீரை பயன்கள்
+ தண்டுக்கீரையைக் குழம்பு, கூட்டு எனச் சமைத்து உண்ணலாம்.
+ தண்டுக்கீரையைச் சாப்பிட்டு வந்தால், குடற்புண் ஆறும்.
+ இந்தக் கீரையில், கால்சியம், பாஸ்பரஸ், வைட்டமின்கள் பி, சி, நார்ச்சத்து ஆகியன உள்ளன.
+ குடற்புண், அல்சர் உள்ளவர்கள், இந்தக் கீரையை, லேசாக அல்லது மசிய வதக்கி உணவில் சேர்த்துக் கொள்ளலாம்.
+ பெண்களின் கருப்பைச் சிக்கலுக்கு, தண்டுக்கீரை நல்ல தீர்வைத் தரும்.
+ இது, குளிர்ச்சியைத் தரும் கீரை. எனவே, மூலநோய் உள்ளவர்கள் இதை உணவில் அடிக்கடி சேர்த்துக் கொள்ளலாம்.
தண்டுக்கீரை சாகுபடி
+ சித்திரை, ஆடி, மார்கழி, மாசியில், தண்டுக் கீரையைப் பயிர் செய்யலாம்.
+ இதற்கு, நல்ல மண்ணும் மணலும் கலந்த அமிலத் தன்மையுள்ள, இருமண் நிலம், செம்மண் நிலம் ஆகியன ஏற்றவை.
+ களிமண் நிலத்தில் இதைப் பயிரிடுவதைத் தவிர்க்க வேண்டும்.
+ தண்டுக்கீரை சாகுபடி நிலத்தை, கடைசி உழவுக்கு முன், ஏக்கருக்குப் பத்து டன் தொழுவுரம் வீதம் இட்டுப் பரப்பி, சமப்படுத்த வேண்டும். மண்புழு உரம், கம்போஸ்ட் ஆகியவற்றையும் இடலாம்.
+ அடுத்து, நீர் வசதிக்கு ஏற்ப, தேவையான அளவில் பாத்திகளை அமைக்க வேண்டும்.
+ பிறகு, ஏக்கருக்கு 2.5 கிலோ விதைகள் வீதம் எடுத்து, மணலில் கலந்து பாத்திகளில் சீராகத் தூவி, விதைகளை மூடும் வகையில் மண்ணை லேசாகக் கிளறி விட்டு, உடனே பாசனம் செய்ய வேண்டும்.
+ நீரின் வேகத்தில் விதைகள் ஒரு பக்கமாகச் செல்லாமல் இருக்க, பூவாளியால் நீரைத் தெளிக்கலாம். அல்லது, விதைகளை அடித்துச் செல்லாத வகையில், கவனமாக நீரைப் பாய்ச்ச வேண்டும்.
+ விதைத்து ஒரு வாரத்தில் விதைகள் முளைக்கத் தொடங்கும்.
+ கீரைச் செடிகள் களைகளால் பாதிக்கப்படாமல் இருக்க, விதைத்து 10-15 நாட்கள் கழித்து, களையெடுக்க வேண்டும்.
+ இலைகள் அதிகமாகத் தழைத்து வர, ஒரு லிட்டர் நீருக்கு 30 மி.லி. பஞ்சகவ்யா வீதம் கலந்து காலை நேரத்தில் தெளிக்கலாம்.
+ ஜீவாமிர்தக் கரைசலைப் பாசனநீரில் கலந்து விடலாம். இதனால், கீரைகளின் வளர்ச்சி நன்றாக இருக்கும்.
+ கீரைகளில் பூச்சிகளின் தாக்குதல் இருந்தால், இஞ்சி, பூண்டுக் கரைசலைத் தெளிக்க வேண்டும்.
+ இஞ்சி, பூண்டு மற்றும் பச்சை மிளகாயைச் சமமாக எடுத்து இடித்து, ஒரு லிட்டர் மாட்டுக் கோமியத்தில் கலந்து ஒருநாள் வைத்திருந்தால், இந்தக் கரைசல் தயாராகி விடும்.
+ இதைப் பத்து லிட்டர் நீருக்கு 300 மி.லி. வீதம் கலந்து, பத்து நாட்களுக்கு ஒருமுறை, காலை நேரத்தில் தெளிக்க வேண்டும்.
+ விதைத்து 35-40 நாட்களில் தண்டுக்கீரையை அறுவடை செய்யலாம். அவரவர் குடும்பத் தேவைக்கு ஏற்ப, வீட்டிலேயே தொட்டிகளில் கூடத் தண்டுக்கிரையை வளர்த்துப் பயன்படுத்தலாம்.
முனைவர் சி.இராஜா பாபு, இணைப் பேராசிரியர் மற்றும் திட்ட ஒருங்கிணைப்பாளர், வேளாண்மை அறிவியல் நிலையம், சிறுகமணி, திருச்சி மாவட்டம்.
